كونان البكتريا

 

  البكتيريا كونان 😎✋ 

مين هي البكتيريا كونان؟ و ليه سموها كده؟ ده اللي هنعرفه النهارده في الموضوع الجديد بتاعنا. 👇👇😉

 البكتيريا كونان اسمها الحقيقي Deinococcus radiodurans ، نوع جديد من البكتيريا المكتشفه حديثاً . العلماء اطلقوا عليها اسم كونان - كونان البربري و هي شخصيه خياليه عن بطل محارب - لقدرتها على تحمل اصعب الظروف اللي ممكن يمر بيها اي كائن حي اخر خصوصا البكتيريا الاخرى و ميقدرش انه يفضل عايش لكن هي بتقدر تعيش و تكمل حياتها بعدها عادي جدا ... طيب  زي ايه الظروف دي ؟؟ 
زي البروده القاسيه ،التدمير بواسطة الأكسده، الأشعاع !!

بحسب المعلومات المتوفره هنا ان كمية الاشعاع اللي لو اتعرضلها الانسان و مات بتكون 10Gy اما كمية الاشعاع اللي ممكن تتعرضلها البكتيريا اللي بنتكلم عنها و تفضل عايشه هي 5000Gy - (تعريف الــGy هو كمية الطاقه الممتصه بالجول لكل كيلو جرام من الماده الممتصه) - و مصادر اخرى بتقول انها بتتحمل كمية اشعاع اكتر من اللي يقدر يتحملها اي انسان بحوالي 3000 مره !!!! انتوا متخيلين قوتها عامله ازاي؟؟ 😭😭

طبعا الكلام ده نشروه في ابحاث علميه و كان من اهمهم من وجهة نظري مجموعه بتتكلم عن قدرة البكتيريا D.radiodurans على العيش على كوكب المريخ!  😃😃 
و ده لانها بتملك كل المواصفات اللي تمكنها من تحمل الظروف المعيشه على الكوكب الاخر زي تحمل البرد و السكون خلال الظروف الصعبه و العيش في الاوساط الخاليه من الهواء و تحمل كمية الأشعاع الموجود على المريخ و ده اللي خلى العلماء يفكروا انهم يغيروا شوية في الجينات بتاعت البكتيريا دي بحيث تنتج اوديه لرواد الفضاء بدل ما ياخدوا معاهم كميات كبيره من الادويه اثناء رحلاتهم في الفضاء .. مش بس كده هما كمان اعتبروها مؤشر كويس جدا لتمهيد الحياه على كوكب المريخ في المستقبل القريب 🙋😂😂 !

كل واحد قاعد دلوقتي يبدأ يجهز نفسه و يعمل حسابه علشان نطلع كلنا على المريخ 😃😃

ان شاء الله يكون الموضوع عجبكم و لو عايزين معلومات تانيه عن الموضوع ده او المواضيع اللي زي كده ياريت تقولولنا .. 

دمتم بخــــير ،،