السالمونيلا salmonella

السالمونيلا :D
الوحش السيمى فاينال دى بكتريا عصوية قصيره و سالبه لجرام و ليها انواع كتيييير اوى و انواعها بتسبب امراض كتير اشهرها التسمم الغذائى و التيفود و الباراتيفود
اول مره شافوا السالمونيلا كان 1880 كان عالم اسمه كارل ايبرث بيفحص طحال مرضى التيفود وبعدها ب 4 سنين عالم اسمه جورج ثيودور جافكى قدر يعزل المسبب المرضى على بيئه و بعدها بسنه عالم اسمه ثيبولد سميث اكتشف نوع تانى من السالمونيلا اسمها Salmonella enterica بس وقتها هو كان شغال مع واحد اسمه دانيال ايلمر سالمون و سميث سمى البكتريا وقتها بكتريا الخنازير العصويه و ف 1900 واحد اسمه جوزيف ليون قدم اقتراح ان البكتريا اللى اكتشفها سالمون تتسمى سالمونيلا على شرف اسمه ( ونعم الشرف والله )
البكتريا دى بتصيب الانسان ازى ؟
اى اكل او طعام ملوث او التعامل مع حد مصاب بيها او حد بيعتنى بحد مصاب بيها (ايه اللبخه دى)
التيفود مرض معوى مش لطيف خالص و بتسببه نوع من السالمونيلا اسمها Salmonella Typhi هو بيتقسم ل3 مراحل اول مرحله بتبقى حراره بتترفع ببطئ و صداع و كحه ووقتها بيتعمل مزرعه للسالمونيلا و لازم ميتاخدش قبل المزرعه اى مضاد حيوى ب36 ساعه ع الاقل عشان الاختبار يبقى مظبوط
الاسبوع التانى بتترفع الحراره ل40 و بيتواجد الميكروب ف الدم و بيبقى فيه تعب كبير ف الجسم و عادة الحراره بتبقى اعلى فى بعد الظهر (بيختار اوقات :D) و بيظهر العرض المميز للتيفود اللى هو بقع روز بتختفى لما بيتضغط عليها
ف الاسبوع التالت ممكن تحصل مضاعفات بسبب ان الحراره عاليه زى التهاب الدماغ و التهاب الشعب الحاد و جفاف يعنى اى مضاعفات الحراره المرتفعه لو متعالجتش
و بعد كده الحراره بتنزل
التيفود ليه تطعيم بيتاخد على 4 اسابيع و تقريبا محدش فينا مخدهوش :D
فيه نوع اخف من التيفود اسمه باراتيفود و بتسببه بكتريا S.Paratyphi
السالمونيلا بتعمل مرض تانى اسمه السالمونيلات (ايش هاذا والله نفس المعنى)
و ده بيبقى تسمم غذائى بانوع السالمونيلا الغير مسببه للتيفود
فى اماكن ف العالم خاصة ف صحراء افريقيا فى انواع من السالمونيلا بتعمل عدوى دمويه
علاجها ببساطه نروح للدكتور
بس الوقايه خير من العلاج
و دمتم سالمين