خلايا خالدة !! HeLa
 |
| خلايا HeLa مصبوغه بHoechst 33258 |
الوقت: 4 فبراير 1951
المكان : الولايات المتحده الامريكية
 |
| هنيريتا لاكس |
هنيريتا لاكسHenrietta Lacks امريكية افريقية كان عندها سرطان عنق رحم و اتاخد جزء من السرطان عشان يتعمل تشخيص و ماتت 4 اكتوبر 1951
الفكره بقى مش هنا
الفكره ان الخلايا اللى اتخدت منها عايشه لحد دلوقت :O
ازاى ؟ كان فيه عالم خلايا اسمه جورج اوتو جاى قال طب وليه منحفظش الخلايا دى و عزل خليه واحده منهم بالفعل و اكثرها و عمل خط كامل من الخلايا و ده اول خط خلايا يتعمل ف التاريخ و سموه الخلايا HeLa على اسم الست اللى اتاخد منها الخلايا دى لا و الخلايا دى خالدة يعنى حتى بعد عدد من الانقسامات زى اى خلايا تانيه يعنى مبيحصلهاش شيخوخه (شابه ع طول ) و طول ما هى حواليها غذائها فى المعمل بتقدر تنقسم و تفضل عايشه و حتى بيحصلها طفرات زى اى خليه اكنها ف جسم الانسان
و بسبب الطفرات دى بقى فيه عدد كبير من سلالات خلايا HeLa بس كلهم جايين من الست هنيريتا يبشبش الطوبه اللى تحت راسها😃
طب كنز زى ده هنعمل ايه بيه ؟ورقه و قلم و اكتبى معايا يا ست الكل
مين ميعرفش جون سالك ؟ عالم الفيرولوجى اللى عمل لقاح شلل الاطفال, جرب اول لقاح لشلل الاطفال على الخلايا دى, لان تم ملاحظة ان سهل اصابتها بفيروس شلل الاطفال و بتموت منه كمان و ده خلاها ماده ممتازه للتجربه عشان سهل انه يعرف اذا كان اللقاح شغال ولا لا (لو شغال الخلايا هتعيش, مش شغال هتموت و هنجيب غيرها من المطبقيه) و من كتر ما كان البحث مهم تم عمل خط انتاج لجون سالك يكثروله خلايا HeLa ليه بس لحد ما عمل اللقاح بنجاح
خلايا HeLa كمان هى اول خلايا يحصلها استنساخ بنجاح (قبل النعجه دوللى ) على يد تيودور باك و فيليب ماركوس, و من وقتها و هى بتستخدم فى ابحاث السرطان و الايدز و تاثير الاشعاع و المواد السامه و بيتعمل بيها خرايط جينية ... الخ الخ
ده غير انها بتستخدم لمعرفة تاثيرات الفيروسات المختلفه على الخلايا و تأثير مواد معينه على الخلايا السرطانيه وازاى نتغلب على مقاومة الخلايا السرطانيه للاشعاع و الكيمياوى
لحد 2009 بس كان فيه فوق 60 الف بحث قائم على خلايا HeLa فهى مهمه جدا
المره الجايه هنتكلم عن الناحية الجينية ليها و الكروموسومات و الذى منه :D
كنت تعرف عنها قبل كده ؟
