بكتريا حمض اللاكتيك
*فى يوم ما مجموعة GIB جابوا سندويتشات*ها مين جنبه المخلل ؟
لا مش هتاخديه
لا هاخده و هاكله
و بينتهى الموضوع بان المخلل فى وسط صراع اتنين بيحبوه و انا قاعده زى النجيله لانى مباكلهوش
:D الموقف اللى فوق ده بيتكرر كتير اوى مش بس بين الصحاب , لو انت مصرى يبقى المخلل جزء من الاكل اهم من الاكل نفسه
:D طب المخلل ازاى بيتعمل ؟
طريقة عمل المخلل دى ف منتدى فتكات احنا هنتكلم من وجهة نظر ميكروبيولوجيه
:D تفتكروا ايه البكتريا اللى بتعمل المخلل ؟
بكتريا حمض اللاكتيك
:D ايون زى ما سمعت دى مجموعة بكتريا كبيره جدا و مهمه جدا و بتدخل ف حاجات كتير اوى
هنتكلم النهارده عن نوع واحد منها اسمه اللاكتوباسيلس Lactobacillus
ده جنس كبير برده
هو تعريفه جنس موجب لجرام اختيارى او بينمو فى ظروف هوائية قليله (يعنى ممكن ينمو و مفيش اكسجين او الاكسجين قليل ) و بينمو فى حموضه عالية
و شكله عصوى طويل و مفيهوش اى جراثيم
طب اللاكتوباسيلس ده بيعمل ايه ؟
القصه ف كلمتين بيحول السكر لحمض
:D فيه منه انواع بتحول السكر لحمض واحد و دى بنسميها homofermentative او متجانسة التخمر
و فيه انواع بتحول السكر لاحماض كتييير و شوية حاجات فوق بعض و دى اسمها heterofermentative او مختلطة التخمر
طب اللاكتوباسيلس بنستخدمهم ف ايه ؟
ف حاجات كتير اوى بس هنقسمهم و نقولهم باختصار :
اولا هو موجود طبيعيا فى بعض اجزاء الجسم خاصة الاجهزه التناسلية
و اللاكتوباسيلس بينتج مضادات حيوية ضد بكتريا و خماير زى الكانديدا اللى اتكلمنا عنها قبل كده
و برده بعض انواع اللاكتوباسيلس مسئوله عن تسويس السنان لانها بتحلل السكريات اللى ف السنان لحمض لاكتيك فبيحلل السنان و بيضرها
نيجى للكبير بقى الاكل :
اللاكتوباسيلس بيتسخدم فى المخلل زى ما قولنا
و فى الصناعات اللبنية زى اللبن الرايب و الجبن و الزبادى و القهوه و الصناعات التخميريه زى الخل و البيره
و برده بيتسخدم فى العلائف او علائق الحيوانات
فهو جنس شامل داخل ف كل حاجه و مهم جدا
تعرف تقولنا بكتريا تانية بتنتج حمض اللاكتيك ؟
#دمتم_سالمين
#MIKU
تعليقات
إرسال تعليق