الحمض النووى
الحمض النووى :O
اى حد بيحب المسلسلات الاجرامية زى حالاتى هيلاقى ان دى اول كلمه بيقولها المحقق
هل وجدتم اى حمض نووى فى مسرح الجريمه ؟
ايه هو الحمض النووى اللى مجنن الناس كلها دى
كنا خدنا زمااااان تكوين الخليه و ان فيها نواه (اولى اعدادى تانيه اعدادى حاجه فى الرينج ده)
اهو النواه دى فيها من جواها حاجه اسمها حمض نووى
هو فى الغالب DNA و فيه حبه حاجات ف الدنيا عندها RNA
طبعا فيه ناس حاسه انى بتكلم عن هارى بوتر دلوقت (ليفوسا نوت ليفيوساااا)
هنبدا بالكبير DNA
عمرك فكرت احنا بشر ازاى ؟ او ازاى بيعرفو من شعرة الشخص ده ايه ؟ او اختبارات الابوه بيعملوها ازاى ؟
ال DNA او Deoxyribonucleic acid ده هو اللى شايل كل معلوماتك الوراثيه من اول جنسك و لون شعرك لحد طريقة تصرفك و عاداتك :D
بيتكون من نيكلوتيدات و دى بتتكون من سكر ريبوزى (بس هنا كان بخيل راح ساب اوكسجين فبقى منقوص ) و ماسك فيه حمض فوسفوريك و فيه حاجه اسمها قاعده نيتروجينية
النهايه اللى فيها الحمض بتبقى اسمها 5' و النهايه اللى فيها السكر اسمها 3'
و بيتحط النيكلوتيدات جنب بعض كده و تعمل شريط و الشريط ده قدامه شريط مكمل ليه فيعملى شريطين و هى دى وحدتنا الاولية اللى خلتك قاعد دلوقت و ان ده لون جسمك و شعرك و عيونك :D
طب ايه علاقة كل ده بالموضوع
عارف لون شعرك ده عباره عن بروتين الجسم اتعرف عليه فخلى اللون كده
ازاى اتعمل البروتين ده ؟
النيكلوتيدات كل 3 جنب بعض بيعملو شفره لحمض امينى معين و الحمض الامينى جنب الحمض الامينى يعمل سلسله ببتيدية و السلسله جنب السلسله تعملنا بروتين :D (حاسة انى ف فقرة الرابط العجيب بتاعت سبيس توون )
و ده يوصلنا لحاجه اسمها المعادله المركزيه
ان الDNA بيحصله حاجه نسخ و النسخ ده بيبقى معناه انه بيجيله حمض اسمه الرسول بينسخ جزء منه عشان يوديه لمركز صنع البروتين فى الخليه اللى هو الريبوسوم و ده اللى بيحول الشفره الوراثيه لبروتين
ببساطه الDNA كبير جدا و مينفعش يطلع من النواه عشان يعبر عن نفسه فبيستعين بماسنجر عشان يكلم الريبوسوم و يقوله اعمليلى البروتين للصفه الفلانيه (الماسنجر ف كل حته حتى ف خلاياك )
شوية ملاحيظ
النيكلوتيدات 4 : ثيامين و سيتوزين و ادينين و جوانين A-C-G-T
ال A بتمسك فى T و الG بيمسك فى C
اول ناس قدموا على اكتشاف الحمض النووى هو واتسون و كريك و بنوا اكتشافهم على صورة للحمض النووى للعالمه Rosalind Franklin
الحمض النووى بيتقاس ب base pair يعنى كل نيكلوتدين مكملتين لبعض تبقى وحده و الحمض النووى فى جسمك لو اتحط جنب بعضه هيوصل للشمس 600 مره و انه مش بيبظ مننا هو ان حاصله حلزنه شديده يعنى اتلف حوالين نفسه كتيييير اوى اوى اوى (الى اللانهائية وما بعدها)
ده اللى كان نفسى اقوله عن الحمض النووى ياريت متكنوش توهتوا :D
طبعا ده حبه قليلين اوووووى الحمض النووى بحر
قولولنا حبة معلومات عنه كده
