الهربس Herpes simple virus
ازيكم
قاعده بتمشى فى الفيس لقيت صفحه بتاعت عناية بشرة
و بتقول ان الهربس فطر
و هنا اشتغلت الشعشعرات الميكروبيلوجيه جوايا :D
اولا الهربس او Herpes simple virus
هو فيروس مغلف حمضه النووى ds-DNA ليه نوعين
HSV1 و ده بيصيب الفم و اللسان
HSV2 و ده بيصيب الاعضاء التناسلية
الهربس فى الغالب ملهوش اى اعراض و حتى وقتها ممكن انه يعدى الناس جدا (يعنى ميبقاش باين عليك اى علامات او حبوب على وشك بس انت بتعدى الناس عادى)
و اوقات بيبقى ليه اعراض اللى هى البثور المعروفه دى -_- اللى بتبقى عايز تولع فيها
و لما بيبقى فيه البثور دى بتبقى امكانية العدوى اقوى بكتيييير اوى (نبطل بوس لما بنسلم بقى)
الهربس بينشط لما بيكون الانسان متوتر او حصل ضرر للبشره و حروق او لما بيحصل اى عدوى فيروسية تانيه ( زى الانفلونزا)
الهربس بيصيب الخلايا الطلائية فى الجسم و بيدخل للنواه و يتضاعف و يخرج من الخليه لخليه تانيه
و اوقات الهربس بيوصل للخلايا العصبيه و ياخدها زى بيته و يتضاعف هناك و كل فتره يخلى جزء منه يروح يعمل اصابه على الفم تانى
الهربس مش بس بيظهر على الفم لا كمان على الاصابع لو لعبت فى البثور
و المصارعين عشان جلدهم باين بيصيب الجذع و الوش كمان :O
و بيعمل اصابة فى العين لو متعالجش و لعبنا فى البثور بيعمل التهاب فى القرنيه و الملتحمه و ده بيخلى الرؤية مشوشة
و لو وصل للمخ بيعمل التهاب سحايا
اصعب حاجه لو الهربس اصاب طفل صغير او حديث ولاده
الهربس فى الاطفال بيعمل البثور مع حراره و كمان بيصيب اللثه و الحلق و سقف الحلق و ده بيخلى صعوبه جامده فى البلع اوى
و فى الاطفال حديثى الولاده الهربس بيجى من الام وقت الولاده
مع اول اسبوعين بيظهر البثور و الحراره
لو متعالجش بيعمل اصابة فى الجهاز العصبى المركزى و ده زى التشويش و النوبات
ولو فضلت الحاله من غير علاج او اتشخصت غلط على انها قلاع عادى
بيحصل تعفن فى الدم و و اختلال للاعضاء او فشل او organ failure
بيتعالج تحت اشراف الطبيب طبعا و بيتاخد ليه مضاد فيروسات مبيقتلش الفيروس بس بيقلل الموضوع حبه
دمتم بخير
واللى يقولك خد مضاد حيوى او مضاد فطريات للهربس
اعمل فيه اللى انت عايزه
ده فيديو بيشرح الموضوع اكتر
