تلوث الغذاء
بسم الله الرحمن الرحيم
طبعا اول ما بنقول كلمة اكل بيجي بقي ف تخيلاتنا الفاهيتا والكريب والشاورما ....الخ 😍😍
طب فكرنا الاكل دا بيتكون من ايه ؟!
اه من بصل وطماطم ولحوم وفراخ وشويه حاجات فوق بعض😂
معني كدا ان المادة الغذائية اللي عندي ممكن تكون نباتيه او حيوانية صلبة او سائله
وعلشان ناكل واحنا مطمنين لازم نعرف نفرق مابين تلوث الغذاء وفساد الغذاء 😉
ايه دا هو فيه فرق بينهم ؟ 🤔
طبعا دا الفرق كبييييير جدا التلوث بيحدث بالميكروبات للمواد الغذائية وهي حالتها خام او خلال مراحل الانتاج او التصنيع او بعد الانتاج او خلال عمليات النقل والتداول او التخزين
يعني بالمختصر ممكن يحصل ف اي وقت واي مرحله 😕
طيب هي الميكروبات واحد؟🤔
هاقولك لا طبعا بتختلف انواع الميكروبات الملوثه واعدادها تبعا لنوع المادة وطريقة انتاجها وتداولها.
علشان كدا لازم نراعي درجه العناية القصوي في كل المراحل.
التلوث كتير وهنحاول نحددهم ونتكلم باختصار عندنا اتنين ايه هما بقي
أ)تلوث الاغذية من المصادر الطبيعية :-
يعني حاجات بره تداول الانسان من الطبيعة ودي بتنقسم ل ٨ فروع
١)تلوث النباتات اثناء وجودها بالحقل.
٢)تلوث عن طريق الحيوانات والحشرات.
٣)تلوث عن طريق الحيوانات والنباتات.
٤)تلوث من المياة.
٥)تلوث من التربة.
٦)تلوث من الهواء.
٧)تلوث من مياة المجاري.
٨)تلوث من الانسان.
والتلوث الناتج من المصادر الطبيعية يعني نقدر اننا نسيطر عليه عن طريق غسيل الاغذية بمختلف انواعها بشكل جيد جدا تحت المياة الجارية فقط 😀
لاتقولي بقي انا بغسل بديتول 😏 ولا بريل ولا اي نوع من المنظفات 😒
هلاقي حد بيقولي ليه بقي؟! 🤔
هاقولك ياسيدي لان انت فعلا بتشيل الميكروبات بس ف الناحية التانية هتحتاج تغسل بالماء الجاري اكثر من 10 مرات علشان تشيل اي اثر للمنظفات دي لان دي تأثيرها ضار ع الانسان 😕
عرفتوا ليه منستخدمش اي منظفات.ونكمل كلامنا عن تلوث الاغذية وننتقل ع النقطة التانية 😉 ودي بتشمل :-
ب) تلوث الاغذية اثناء التداول والتصنيع:-
ودي هنلاقي فيها بقي ان منها اسباب متعلقه بالتلوث الطبيعي بمعني
1)عمليات غسيل الخضروات بالنقع ف المياة بتعمل علي توزيع التلوث الميكروبي علي جميع سطحها واللي بيقلل الاثر دا باستخدام مادة مطهرة.
وهنا هلاقي حد يستوقفني ويقولي ما المرة اللي فاتت قولنا استخدام ماء جاري فقط 🤔 هاتروشونا ليه 😠
هاقوله ركز معايا شوية 😒 الغسيل بالماء الجاري بنقلل من الميكروبات الموجودة ع القشرة انما هنا قولنا نقع وتاني حاجه المادة المطهرة حاجه والمنظفات حاجه تانيه خالص الله يكرمكم والاستخدام المنزلي يختلف عن المصانع 😀
2)تؤدي عمليات تداول الاغذية لحدوث اضرار ف انسجتها الخارجية مما يسهل دخول الفساد . مثلا يعني تداول البرتقال او الطماطم ايا كان والقشرة اللي برة اتقطعت فده بيخلي الميكروبات بانواعها المختلفه تدخل للانسجه من جوة اسهل بكتير من القشرة السليمة وبيسرع من فسادها. تمام فهمنا كدا ؟! ☺
3)يؤدي استعمال اجزاء متحللة من الفواكة اثناء العصير لزيادة المحتوي الميكروبي له ويسرع من الفساد.
اتحدي ان فيه حد فهم حاجه من دي 😂😂
بص ياسيدي 🙄 يعني لما تستخدم فاكهه طرية شوية او مستوية اوي وتعمل بيها عصير بتبوظ بسرعه وتعمل طعم لاذع وتحمض دا نتيجه ان الميكروبات الموجودة حصلها تكاثر واعدادها كترت بسرعه وده اللي عمل الفساد اسرع من انك تستخدم فاكهة سليمة. اظن كدا اتفهمت 😉😉 الحمدلله 😇
4) الميكروبات موجودة ف كل حتة وكل مكان وزمان ولكن مبتعملش اي ضرر طالما مجتش ناحيتنا متفقين؟! تماااام 😁
انما بقي لو دخلت جوا جسمنا كدا يبقي هاتأذينا
طب هاتيجي ازاي طالما احنا ماشيين كل الخطوات صح؟!
هاقولك ياسيدي انها من استخدام ادوات واجهزة ملوثة ومتعملش ليها تطهير او تعقيم كدا يبقي احنا الحمدلله بهدلنا الدنيا 🙁 وعملنا تسريع وتلوث الغذاء ف النقل والتقطيع والتخزين والتعبئة كمان 😣😣
5)نيجي بقي للحوم:- الانسجه الداخلية للذبيحه بتكون خالية تماما من الميكروبات نقدر نقول معقمة انما التلوث بقي بيجيلها من المصادر الخارجية من السلخ والغسيل والتداول وممكن يجي التلوث ليها كمان من خلال تقطيع الاحشاء الداخلية والامعاء اللي ماشاء الله مليانه بالميكروبات.
6)تعالالي للاسماك بقي 😎
معروف ان الطبقه الخارجية اللزجه دي مليانه بالميكروبات لانها معرضه للعوامل الخارجية من قوارب الصيد وايدي وملابس وادوات الصيادين ولو ماخدناش بالنا بتنتقل الميكروبات دي لانسجه السنك الداخلية من خلال التنظيف كمان فتح الاسماك وتنظيفها قبل التخزين وقبل غسيلها بشكل سليم بيعمل ع تقليل مدة الحفظ ليها
ليه بقي؟! لان الميكروبات الموجودة ف الاحشاء الداخلية بتنتشر ف كل انسجه السمكة.
الكلام عن التلوث كتير ومبيخلصش بس لسه هانتكلم عن حاجات كتير وعن عادات غلط وازاي نحافظ ع نفسنا من التلوث
