المعادلة المركزية central dogma: رحلة الى مركز البروتين

السلام عليكم
ازيكم
الموضوع هيبقى طويل شويه فجهزوا نفسكم لرحله الى الميكانيكية اللى مخلياك قاعد دلوقت و بتقرا :D
انتاج البروتين (موسيقى بيتهوفن هنا)

اولا عشان نفهم هنتكلم عن شوية حاجات الاول

الحمض النووى زى ما شرحنا قبل كده فيه منه DNA و RNA و لو فاتك الموضوع تقدر تقراه من هنا الحمض النووى
هنتكلم الاول بقى عن RNA


بصوا باختصار هو بيتكون من سكر ريبوز و حمض فوسفوريك و قواعد نتيروجينية
بس بدل ماهى فى DNA بتكون ACGT فى RNA بدل الT بيبقى فيه قاعده اسمها U او اليوراسيل
و السكر فى DNA ريبوز ناقص منه اكسجينه الRNA مش ناقص منه حاجه :D ده غير ان ف الغالب RNA بيبقى شريط واحد بس و كمان ليه 3 انواع

1. mRNA او الرسول و ده بيحصل فى النواه و بياخد شفرة البروتين اللى لازم يتجهز من النواه للريبوسوم
2. tRNA و ده الناقل و ده بيتواجد فى السيتوبلازم و بينقل الاحماض الامينية للريبوسوم 
3. rRNA او الريبوسوم و ده مصنع انتاج البروتين فى الخليه بيقرا كل 3 قواعد على mRNA و يخلى tRNA يجيب الحمض الامينى المناسب ل3 قواعد دول و يعمل سلسله ببتيدية

 الRNA يعتبر الماده الوراثيه لبعض الفيروسات بس فى معظم الكائنات الماده الوراثيه هى DNA
تمام كده
نيجى لحاجه كمان
ايه هو البروتين اصلا :D
البروتين هو بناء الجسم يعنى عضلاتك بروتين و انزيماتك بروتين و عشان كده البروتين مهم جدا
طب بيتكون من ايه ؟

البروتين بيتكون من حاجه اسمها سلاسل ببتيدية و السلاسل دى بتتكون من حاجه اسمها الاحماض الامينيه و هى 22 حمض امينى منها اساسى و الجسم مبيعرفش يخلقها فلازم تاخدها من الاكل (عشان كده اكل البروتين مهم جدا ) و منها الغير اساسى و ده الجسم بيعرف يخلقها عادى جدا

الاحماض الامينية

ازاى بتتكون الرابطه الببتيدية اللى بتعمل السلسه

البروتين عشان يبقى ليه وظيفه بيتطبق كذا مره
اول تطبيقه اسمها البناء الاولى و دى حبة احماض امينية جنب بعض عملت سلسله ببتيدية
تانى تطبيقه اسمها بناء ثانوى السلسله بتيجى جنب السلسله و تعمل ياما حلزون الفا ياما طبقة بيتا
تالت واحده اسمها ثالثى و دى الحلزونات و الطبقات بيتطبقو على بعض
الرابع بقى اسمه بناء رباعى و ده بناءات ثلاثيه بتطبق على بعضها



تمام كده :D
نيجى للمعادلة المركزيه بقى

ال Central dogma اول حد اتكلم عنها كان فرانسيس كريك اللى كان بمساعدة واطسون اكتشفو الحمض النووى
و هى ببساطه شديده  الDNA بيعمل RNA وبعدين يعمل البروتين
بتبدا الرحله من النواه
الDNA بيبقى موجود فى النواه متحلزن تحلزن فائق تيجى الخليه تحتاج اى بروتين فبيتم فك حلزنة عند الجين اللى عليه شفرة البروتين دى
و بعدين تيجى انزيمات RNA polymerase و تعمل نسخه مكمله من RNA و ده بيبقى mRNA
و دى عمليه بتتسمى النسخ او transcription لانى بعمل نسخه من DNA بس بتبقى RNA
الmRNA وقتها مبيبقاش ناضج او ينفع انه يعمل اى حاجه لان فيه حاجه اسمها اكسونات و انترونات
الاكسونات هى الاجزاء اللى المفروض تتقرى و تعمل بروتين و الانترونات هى الاجزاء الزياده
ف spliceosome بتقوم بقص او ازالة الانترونات و لحم الاكسونات مع بعضها
كده بقى ناضج و ينفع يشتغل ؟ لا برده بيتحطله cap على النهاية رقم 5' و ديل من الادينين و بكده يقدر يخرج للسيتوبلازم من غير ما يحصله هضم او تكسير :D





و يطلع للسيتوبلازم يروح للشبكه الاندوبلازمية اللى عليها الريبوسومات او rRNA  و ده بيتكون من وحدتين كبيره و صغيره
الصغيره بتمسك الmRNA مع الوحده الكبيره
و الكبيره بتمسك tRNA و هو بيجيب الاحماض الامينية

المهم بيدخل الmRNA جوا الوحدتين و الوحده الكبيره تبدا تقرا الكود
كل 3 قواعد نيتروجينيه جنب بعضها بتبقى شفره لحمض امينى معين

اكواد الاحماض الامينية

الموضوع بيبدا بشفره اسمها البدايه و بيبقى حمض الميثونين فبيجى tRNA بحمض الميثونين و يديه للريبوسوم و بعدين الحمض اللى بعده على حسب الكود فكل حمضين جنب بعض بيتم عمل رابطه بيبتديه ما بينهم و بيفضل يحصل كده لحد ما يجى شفرة النهايه
و يخلص عمل السلسه و دى بتتسمى الترجمه او translation انى اترجم الاكواد على mRNA الى احماض امينيه و اعمل سلسله ببتيديه و ينتهى الامر بانى عملت بروتين بيستخدم فى العمليات الحيويه


و تبدا تلتف حوالين نفسها بحاجه اسمها الشابيرون Chaperone
 عادة البروتينات بتبقى شغاله مع البناء التالت او الرابع


ده فيديو بيوضح العمليه شغلو ال captions عشان الترجمه

يارب اكون عرفت اوصل المعلومه
لو فيه اى حاجه مش مفهومه تقدرو تتواصلو معانا بالكومنتات تحت او على صفحتنا على الفيس بوك

Another life Page